Alþjóðaólympíunefndin (IOC) er sjálfstæð, alþjóðleg stofnun sem fer með yfirstjórn ólympíuhreyfingarinnar. Hún var stofnuð árið 1894 og hefur höfuðstöðvar í Lausanne í Sviss. Helstu verkefni IOC eru skipulagning Ólympíuleikanna, viðhald og þróun Ólympíusáttmálans, stuðningur við íþróttahreyfingar, kynning á ólympískum gildum og eftirlit með heiðarleika í íþróttum. ÍSÍ er viðurkenndur fulltrúi Íslands innan hreyfingarinnar og skuldbindur sig þar með til að virða reglur IOC, Alþjóðalyfjareglurnar og Ólympíusáttmálann. 

Nánar um IOC. 

ÍSÍ er æðsti aðili frjálsrar íþróttastarfsemi í landinu samkvæmt Íþróttalögum nr. 64/1998. Sambandið er landssamband sérsambanda og íþróttahéraða. Hlutverk ÍSÍ er að efla, samræma og skipuleggja íþróttastarf á Íslandi, stuðla að þróun afreksíþrótta jafnt sem almenningsíþrótta, annast samstarf við stjórnvöld og stofnanir og vera fulltrúi Íslands í íþróttamálum gagnvart öðrum þjóðum. Þá ber ÍSÍ einnig að tryggja jafnrétti, vinna gegn mismunun og berjast gegn hvers kyns ofbeldi í íþróttum.

Hlekkur á lög ÍSÍ. 

Ungmennafélag Íslands (UMFÍ) er landssamband ungmennafélaga á Íslandi og skiptist í ungmennafélög og íþróttahéruð. UMFÍ er þjónustu- og samræmingaraðili fyrir sambandsaðila og aðildarfélög þeirra og leggur áherslu á að skapa sem flestum tækifæri til þátttöku í heilbrigðu félags- og íþróttastarfi. Hlutverk UMFÍ er að rækta lýð og land með því að bjóða upp á fjölbreytt íþrótta- og æskulýðsstarf, stuðla að heilbrigðum lífsháttum, fræðslu og forvörnum og leggja áherslu á landgræðslu, skógrækt og umhverfisvernd. Með starfi sínu skapar UMFÍ aðstæður þar sem gleði og samvinna styrkja íþrótta- og æskulýðshreyfinguna um allt land.

Hlekkur á lög UMFÍ.  

Sérsambönd eru landsamtök sem mynda yfirstjórn einstakra íþróttagreina og eru aðilar að ÍSÍ. Aðeins eitt sérsamband er viðurkennt fyrir hverja íþróttagrein og skal það vera eða geta orðið aðili að alþjóðasérsambandi viðkomandi íþróttar sem nýtur viðurkenningar IOC. Sérsambönd hafa það hlutverk að efla og þróa sína íþróttagrein, setja reglur, löggilda dómara, ráðstafa mótum og staðfesta met. Þau bera einnig ábyrgð á faglegum stjórnarháttum, stuðningi við íþróttahéruð og að vera fulltrúar greinarinnar á alþjóðavettvangi. 

Listi yfir sérsambönd og heimasíður þeirra er að finna hér. 

Samkvæmt Íþróttalögum er landinu skipt í íþróttahéruð og annast ÍSÍ og UMFÍ skiptingu þeirra og breytingar eftir þörfum. Í hverju héraði starfar eitt Héraðssamband eða Íþróttabandalag sem sameinar öll íþróttafélög á svæðinu og vinnur að hagsmunamálum þeirra. Íþróttahéruð gegna lykilhlutverki í að efla íþróttastarf í nærumhverfi barna, ungmenna og fullorðinna og tengja íþróttafélögin við heildarsamtökin ÍSÍ og UMFÍ. Íþróttahéruð tryggja að íþróttastarf sé aðgengilegt um allt land. Í dag eru 25 íþróttahéruð á Íslandi og nánar er fjallað um hlutverk þeirra í 6. kafla laga ÍSÍ. 

Listi yfir íþróttahéruð og heimasíður þeirra er að finna hér. 

ÍSÍ og UMFÍ komu á fót átta svæðisstöðvum með stuðningi frá mennta- og barnamálaráðuneytinu árið 2024. Hlutverk svæðisstöðva er að þjónusta íþróttahéruðin í nærumhverfi sínu með samræmdum hætti. Horft er til þess að sterkari íþróttahéruð og svæðisstöðvar um allt land auki skilvirkni innan íþróttahreyfingarinnar og geri þeim kleift að takast á við núverandi og fyrirséð verkefni. Styrkja stefnumótandi vinnu og aðgerðir á landsvísu og stuðla þannig að farsæld barna og annarra sem nýta þjónustu hreyfingarinnar.   

Sjá nánari upplýsingar hér. 

Að mörgu er að huga þegar kemur að starfsemi íþróttafélaga. Starfsemi félaga er mismikil eftir stærð og umfangi félaga. Lang flest íþróttafélög á Íslandi eiga það sameiginlegt að starfa samkvæmt lögum ÍSÍ og/eða UMFÍ. Félögin eru skráð í félagakerfi íþrótta- og ungmennafélagshreyfingarinnar og lúta þar ákveðnum skyldum og eins réttindum. 

Hlutverk félaga er að halda úti æfingum og þátttöku í keppnum og fá til þess þjálfara og umsjónaraðila. Þá þurfa félög að huga að fjármögnun og færslu bókhalds samkvæmt hefðbundnum stöðlum og reglum, ásamt því að boða til aðalfundar á hverju ári. Félög þurfa á hverju ári að skila inn í starfs starfsskýrslu en þar eru færðar inn upplýsingar um stjórn, starfsfólk, iðkendur og félagsmenn ásamt því að skila þarf ársreikningi og lögum félagsins. 

Fulltrúar íþróttafélags sækja þing í því íþróttahéraði sem félagið tilheyrir og fulltrúar íþróttahéraðs sækja þing sérsambanda. Á þingum landssamtaka ÍSÍ og UMFÍ eiga svo fulltrúar íþróttahéraða og/eða sérsambanda rétt til þátttöku á þingi. 

• Starfa samkvæmt lögum ÍSÍ og UMFÍ / íþróttahéraðs / sérsambands / félagsins.
• Senda starfsskýrslu ásamt félaga og iðkenda skráningu í félagakerfi íþrótta- og ungmennafélagshreyfingarinnar fyrir apríl ár hvert.
• Skila á ársskýrslu og ársreikningum til íþróttahéraðs.
• Ráða þjálfara og raða niður æfingatímum.
• Kanna hæfi þjálfara og sjálfboðaliða (sakavottorð, menntun- og hæfnikröfur).
• Halda úti æfingum og þátttöku í viðburðum og keppni.
• Fjármagna starfsemina og færa bókhald.
• Vinna skv. stefnumótun félags
• Halda aðalfund árlega.
• Taka þátt í ársþingi ÍSÍ, UMFÍ, íþróttahéraðs og/eða sérsambanda eins og við á.