ÍSÍ og UMFÍ

SAMSTARFS-VERKEFNI

ÍSÍ og UMFÍ hafa í gegnum tíðina unnið saman að fjölmörgum verkefnum sem hafa styrkt og eflt íþrótta- og ungmennafélagsstarf um land allt. Á þessari síðu er að finna upplýsingar um helstu sameiginlegu verkefni sambandanna.

SÝNUM KARAKTER

Sýnum karakter er fræðslu- og þróunarverkefni sem snýr að því að efla sálræna og félagslega færni barna og ungmenna í íþróttum. Verkefnið byggir á þeirri hugmynd að hægt sé að þjálfa karakter – eins og sjálfstraust, einbeitingu og samskipti – á sama hátt og líkamlega færni. Markmiðið er að styðja þjálfara og íþróttafélög í að byggja upp bæði góða einstaklinga og sterka liðsheild

Verkefnið býður upp á hagnýt verkfæri fyrir þjálfara, meðal annars fræðsluefni, greinar, dæmi úr starfi og svokallaða „verkfærakistu“ með æfingum og leiðum til að vinna markvisst með þætti eins og áhuga, markmiðasetningu, félagsfærni, sjálfstraust, leiðtogahæfni og einbeitingu í daglegri þjálfun

FIMM C

5C er aðferðafræði í sálfræðilegri færniþjálfun í íþróttum sem miðar að því að efla hugarfar og félagslega færni iðkenda samhliða líkamlegri þjálfun. Hún byggir á rannsóknum og er notuð víða til að styðja íþróttafólk, þjálfara og foreldra í að takast á við kröfur íþrótta og daglegs lífs.

Kjarninn í 5C eru fimm lykilþættir: skuldbinding, samskipti, einbeiting, sjálfsstjórn og sjálfstraust. Verkefnið býður upp á hagnýt námskeið, fræðslu og leiðir fyrir þjálfara og félög til að vinna markvisst með þessa þætti í daglegri þjálfun og skapa jákvætt og styðjandi íþróttaumhverfi.

KONUR Í ÍÞRÓTTUM

Konur í íþróttum er fræðsluþáttaröð um og fyrir íþróttakonur og er samstarfsverkefni Háskólans í Reykjavík, KSÍ, UMFÍ og ÍSÍ. Verkefnið miðar að því að efla þekkingu á sértækum þáttum sem snerta íþróttakonur, með það að markmiði að bæta frammistöðu, draga úr meiðslum og styðja við heilsu og velsæld þeirra á öllum aldri. 

Verkefnið byggir á fjölbreyttu fræðsluefni, meðal annars stuttum myndböndum og lengri fyrirlestrum sem byggja á nýjustu vísindalegu þekkingu. Efnið er ætlað bæði ungum íþróttakonum og þeim sem styðja við þær, og tekur á lykilþáttum eins og hormóna- og kvenheilsu, tíðahring, álagi, meiðslum, andlegri heilsu og endurheimt.