LÆRÐU HVERNIG VIÐ GETUM ÖLL STUÐLAÐ AÐ BETRI UPPLIFUN BARNA OG UNGMENNA Í ÍÞRÓTTUM

FRÆÐSLUMYNDBÖND

Hér má finna fræðslumyndbönd um málefni sem snerta íþrótta- og ungmennafélagshreyfinguna á fjölbreyttan hátt. Myndböndin eru hugsuð sem stuðningur við þjálfara, stjórnendur, foreldra og aðra sem vilja stuðla að jákvæðu, öruggu og farsælu umhverfi fyrir iðkendur. Með myndböndunum fylgja víða frekara fræðsluefni, verkfæri og hagnýtar leiðbeiningar.

VEÐMÁL

Hvert er hlutverk íþróttahreyfingarinnar þegar kemur að veðmálum?
Í myndbandinu fjallar Skúli Bragi Geirdal, sviðsstjóri hjá Netvís, um áhrif veðmála, markaðssetningu þeirra og hvernig hún getur haft áhrif á viðhorf og hegðun ungs fólks. Rætt er um mikilvægi sjálfstæðrar ákvarðanatöku, ábyrgðar og þess að leita sér aðstoðar ef vandamál koma upp. Markmið myndbandsins er að auka vitund um áhrif veðmála og efla umræðu um ábyrgð og forvarnir innan íþrótta- og ungmennafélagshreyfingarinnar.

Knattspyrnusamband Íslands (KSÍ) og SÁÁ hafa jafnframt tekið saman vandað efni um þetta mikilvæga mál. Það styður við þessa umræðu og er þar að finna upplýsingar og stuðning. Við hvetjum fólk til að kynna sér efnið og deila því líka áfram. Sjá efnið hér.

HAGRÆÐING ÚRSLITA (Bönnuð veðmál)

Hvernig getum við verndað heiðarleika í íþróttum?

Hagræðing úrslita og ólögleg veðmál geta haft alvarleg áhrif á íþróttastarf og traustið sem það byggir á. Í þessu myndbandi fer Birgir Sverrisson, framkvæmdastjóri Lyfjaeftirlits Íslands, yfir mikilvægi þess að þjálfarar ræði reglulega við iðkendur um heiðarleika, ábyrgð og þau gildi sem íþróttir standa fyrir.

Fjallað er um hvernig skapa má öruggt umhverfi þar sem iðkendur treysta sér til að segja frá ef þeir verða fyrir óeðlilegum áhrifum eða fyrirspurnum tengdum hagræðingu úrslita. Einnig er farið yfir hvernig hægt er að tilkynna grunsamlega eða ólöglega starfsemi nafnlaust.

Myndbandið er ætlað þjálfurum og öðrum sem starfa með ungu íþróttafólki og er hugsað sem verkfæri til að hefja mikilvægt samtal um heiðarleika í íþróttum.

LYFJAMÁL OG ÁBYRGÐ Í ÍÞRÓTTASTARFI

Veistu hvaða ábyrgð þú berð sem þjálfari þegar kemur að lyfjamálum í íþróttum?

Í myndbandinu fer Birgir Sverrisson, framkvæmdastjóri Lyfjaeftirlits Íslands, yfir helstu atriði sem þjálfarar og aðrir sem starfa með ungmennum í íþróttum þurfa að hafa í huga þegar kemur að lyfjamálum og ábyrgð innan íþróttastarfs.

Myndbandið er ætlað sem kveikja og fyrsta skref fyrir þjálfara sem vilja auka þekkingu sína á lyfjamálum og fræðslu tengdri þeim. Jafnframt er bent á heimasíðu Lyfjaeftirlits Íslands þar sem finna má námskeið, leiðbeiningar og annað fræðsluefni fyrir þjálfara, iðkendur og foreldra.

SAMFÉLAGSMIÐLAR

Hversu mikil áhrif hafa samfélagsmiðlar á það sem þú horfir á, hugsað og gerir á hverjum degi?

Í myndbandinu fer Haukur Brynjarsson, sérfræðingur hjá Netvís, yfir áhrif samfélagsmiðla og hvernig þeir eru hannaðir til að grípa og halda athygli notenda. Hann fjallar um hvernig samfélagsmiðlar virka, hlutverk áhrifavalda og hvort hægt sé að treysta öllu því sem birtist í færslum og auglýsingum.

Einnig er rætt um samskipti á samfélagsmiðlum, stafræna hegðun og hvernig einstaklingar móta og birta eigin ímynd á netinu.

Myndbandið er ætlað ungmennum og hefur það að markmiði að auka meðvitund um áhrif samfélagsmiðla, efla gagnrýna hugsun og hjálpa þeim að átta sig betur á þeim aðferðum sem notaðar eru til að halda athygli fólks við skjáinn.

ÞJÁLFUN FÓLKS MEÐ FÖTLUN

Hvernig getum við tryggt að allir fái tækifæri til að njóta sín og vaxa í íþróttastarfi?

Í myndbandinu fer Bára Fanney Hálfdánardóttir, sálfræðingur og þjálfari Special Olympics hjá Haukum, yfir reynslu sína af þjálfun fólks með fötlun og mikilvægi þess að skapa jákvætt, öruggt og aðgengilegt íþróttaumhverfi fyrir alla.

Myndbandið er hluti af fræðslu fyrir þjálfara og hefur það að markmiði að auka þekkingu, áhuga og sjálfstraust þeirra sem vilja starfa með fjölbreyttum hópi iðkenda. Lögð er áhersla á að þjálfun fólks með fötlun sé í grunninn ekki frábrugðin annarri þjálfun heldur snúist fyrst og fremst um að mæta hverjum einstaklingi út frá hans forsendum, styrkleikum og þörfum.

Myndbandið er hluti af verkefninu Allir með!, sem hefur það að markmiði að efla þátttöku og aðgengi fólks með fötlun að íþrótta- og tómstundastarfi.

MÓTTAKA BARNA Á ÍÞRÓTTAÆFINGAR

Hvaða áhrif getur fyrsta æfingin haft á hvort barn vilji halda áfram í íþróttum?
Í myndbandinu fer Petra Ruth Rúnarsdóttir, svæðisfulltrúi Suðurnesja, yfir atriði sem gott er fyrir þjálfara að hafa í huga þegar tekið er á móti börnum sem hefja þátttöku í íþróttastarfi. Lögð er áhersla á jákvæðar móttökur, öryggi, góð samskipti og hvernig skapa má aðgengilegt og hvetjandi umhverfi fyrir nýja iðkendur og fjölskyldur þeirra.

Myndbandið er ætlað þjálfurum, stjórnendum og öðrum sem koma að starfi íþróttafélaga og er hugsað sem stuðningur við innleiðingu góðra móttökuaðferða. Það byggir á vinnu svæðisfulltrúa á Suðurnesjum við þróun móttökuáætlunar fyrir nýja iðkendur.

Verkefnið er tilraunaverkefni sem ætlað er að þróa efni og verklag sem síðar verður hægt að nýta hjá íþróttafélögum og hreyfingunni um land allt.