STEFNUMÓTUN

Vinna við heildstæða stefnumótun fyrir íþróttahreyfinguna á Íslandi er hafin með það að markmiði að móta sameiginlega framtíðarsýn, skýra forgangsröðun og efla stoðir íþrótta- og ungmennahreyfingarinnar til lengri tíma.

Stefnumótunin tekur til allrar starfsemi hreyfingarinnar, allt frá grasrótar- og æskulýðsstarfi til afreksíþrótta, lýðheilsu og samfélagslegrar þátttöku. Áhersla er lögð á víðtækt samráð við íþróttafélög, íþróttahéruð, sérsambönd og aðra hagaðila um land allt.

Verkefnið er unnið í nánu samstarfi ÍSÍ og UMFÍ undir stjórn sameiginlegs stýrihóps með fulltrúum beggja samtaka. Markmiðið er að skapa stefnu sem byggir á þekkingu, reynslu og sameiginlegri sýn íþróttahreyfingarinnar.

Ferlið felur í sér vinnustofur, greiningar, samráðsfundi og samtöl við hagaðila þar sem einstaklingum og félögum gefst tækifæri til að leggja sitt af mörkum. Með þeirri vinnu er lagður traustur grunnur að áframhaldandi þróun íslenskrar íþróttahreyfingar til framtíðar.

Hvar stendur verkefnið í dag?

Undanfarna mánuði hefur farið fram umfangsmikil samráðs- og greiningarvinna um allt land. Fulltrúar íþróttahreyfingarinnar hafa tekið þátt í fjölmörgum vinnufundum þar sem rætt hefur verið um framtíðarsýn hreyfingarinnar, helstu áskoranir og þau tækifæri sem blasa við.

Jafnframt hafa verið haldnir fundir með fulltrúum sveitarfélaga, ríkis, atvinnulífs, skólasamfélags, háskóla og annarra hagaðila til að tryggja að sem víðast sjónarmið komi fram.

Vinnan hefur hingað til byggst á þremur meginsviðum:

• Grasrótarstarfi
• Afreksstarfi
• Samfélagslegu hlutverki íþróttahreyfingarinnar, með sérstakri áherslu á forvarnir og lýðheilsu.

Þessi vinna hefur skapað sterkan grunn fyrir næsta áfanga stefnumótunarinnar.

Næsti áfangi

Stefnumótunarvinnan færist nú yfir í næsta áfanga þar sem lögð verður áhersla á að móta skýr markmið, skilgreina áherslur og útfæra hvernig stefnunni verður hrint í framkvæmd.

Samhliða verður unnið að tillögum um fjármögnun, skipulag, hlutverk einstakra eininga innan hreyfingarinnar og samstarf milli þeirra. Áfram verður lögð rík áhersla á samráð við grasrótina um allt land og að byggja ákvarðanir á gögnum, reynslu og sameiginlegri sýn íþróttahreyfingarinnar.

Áhugi á verkefninu hefur verið mikill og fjölmargir einstaklingar hafa þegar tekið þátt í vinnunni. Gert er ráð fyrir að enn fleiri komi að verkefninu eftir því sem stefnumótunin þróast áfram.

Næstu skref

Fyrsti hluti stefnunnar, sem snýr að framtíðarsýn og megináherslum til framtíðar, verður lagður fyrir stjórnir ÍSÍ og UMFÍ sumarið 2026. Að því loknu verða tillögurnar ræddar á formannafundi í nóvember 2026 áður en þær verða kynntar íþróttahreyfingunni í heild.

Stefnumótunarvinnan er unnin á vegum sameiginlegs stýrihóps ÍSÍ og UMFÍ og er markmiðið að niðurstöður hennar verði formlega kynntar á Íþróttaþingi árið 2027.

Stýrihópur

Í stýrihópi stefnumótunarinnar sitja fulltrúar tilnefndir af stjórnum ÍSÍ og UMFÍ.

Þau eru:

Kári Mímisson, ÍSÍ

Willum Þór Þórsson, ÍSÍ

Halla Margrét Jónsdóttir, UMFÍ

Helgi Sigurður Haraldsson, UMFÍ