Allir með

Allir með er samstarfsverkefni ÍSÍ, UMFÍ og Íþróttasambands fatlaðra (ÍF) sem hófst í byrjun árs 2023 og miðar að því að fjölga tækifærum barna með sér- og stuðningsþarfir í skipulögðu íþróttastarfi. Verkefnið er liður í að ná markmiðum 30. gr. samnings Sameinuðu þjóðanna um réttindi fatlaðs fólks og er styrkt af félags- og vinnumarkaðsráðuneytinu, heilbrigðisráðuneytinu og mennta- og barnamálaráðuneytinu.

Á tímabilinu 2025–2026 hefur þátttaka hópsins aukist úr um 4% í 8,5% og í nóvember 2025 buðu 34 íþróttafélög víðs vegar um landið upp á starf fyrir þennan hóp.

Unnið hefur verið að uppbyggingu nýs starfs, fræðslu þjálfara, bættu aðgengi að sérhæfðum búnaði og fjölgun íþróttagreina, auk þess sem Íslandsleikar og Allir með leikarnir hafa fest sig í sessi og Stjörnuleikarnir bæst við sem svæðisbundið grasrótarverkefni.

Hvatasjóður íþróttahreyfingarinnar hefur verið mikilvægur liður í uppbyggingunni, en í júní 2025 var 38,49 milljónum króna úthlutað til verkefna sem styðja við íþróttastarf fatlaðra. Áframhald verkefnisins hefur verið tryggt með 20 milljóna króna árlegu framlagi árin 2026–2028.

Valdimar Gunnarsson lét af störfum sem verkefnastjóri verkefnisins í júní 2026. Í hans stað tók Thelma Dögg Grétarsdóttir við keflinu.