ÁTTA SVÆÐISSTÖÐVAR UM LAND ALLT

ÍSÍ og UMFÍ komu á fót átta svæðisstöðvum með stuðningi frá mennta- og barnamálaráðuneytinu árið 2024. Svæðisstöðvunum er ætlað að styðja við íþróttahéruð landsins við innleiðingu á stefnu íþróttahreyfingarinnar og ríkisins í íþróttamálum auk þess að auka þátttöku barna og ungmenna í íþróttastarfi með sérstaka áherslu á þátttöku fatlaðra barna, barna af tekjulægri heimilum og barna með fjölbreyttan tungumála- og menningarbakgrunn.

FRAMTÍÐARSÝN

Framtíðarsýn er að fyrirkomulagið skili sér í betri nýtingu á mannauði. Stuðningur við einstaka íþróttafélög verði meiri og þar af leiðandi verði þjónusta við iðkendur betri. Jafnframt er það framtíðarsýn að sem flestir hafi tækifæri til að stunda íþróttir á því sviði sem þeir kjósa, hvort heldur til ánægju, heilsubótar eða með afreksárangri að markmiði. 

AÐDRAGANDI

ÍSÍ og UMFÍ starfræktu vinnuhópa til að skoða stöðu íþróttahéraða í landinu. Alls eru íþróttahéruð landsins 25 um land allt, með ólíka starfsemi og virkni. Úthlutun fjármagns frá lottó til íþróttahéraða og aðildarfélaga þeirra hefur verið mismunandi og reglur hjá ÍSÍ og UMFÍ ólíkar. Sameiginlegar nefndir samtakanna unnu tillögur varðandi samræmda skiptingu lottófjármuna sem stjórnir og nefndir samtakanna komu sér saman um. Hagsmunaaðilar um allt land, stórir sem smáir, komu að skipulaginu. Tekið var tillit til víðtækra sjónarmiða. Áhersla var að niðurstaðan tryggði aukið fjármagn út á land, samræmdar reglur verði óháð aðild að samtökunum og sérstök áhersla var lögð á að uppfylla markmið samtakanna og stjórnvalda.